هاي القصة حقيقة بكل تفاصيلهة عدة بعض الامور الجانبية الي غيرت بيهة علمود لاتنعرف الشخصية طبعا التقيت وياهة بالمحكمه من كنت اسوي بحوث وربطتني بيهة صداقة حبت تنقل قصتهة وتشاركهة وياكم بس بيهة اشياء ما انصح الصغار يقروهة دون سن 18 بنات او ولد نبهت سابقا ...

البارت الاول

احلى يوم بحياتي يوم 8/3/2013 كان يوم عرسي اهلي مخبوصين واني مسبية سباية بالتحضيرات والتجهيزات ملابسي اكسسواراتي الم بيهن وهوسة المعازيم وكول شوي اني وخواتي ناخذ هزة ونرجع لشغلنه 😂 ركصت وعنفصت من الفرحة ممصدكه الي احبة صار اليه واخيراا اااالله احساسي ما اعرف اوصفة انتضرنه 3 سنين واحنه اناضل ونجاهد علمود نصير لبعض ..

عندي 2 اخوة و2 خوات واني ثالثتهن بابا حداد وماما ربة بيت
الحمد لله امورنه المادية ماشية بيت ملك وشغل بابا رحمه من الله واخوتي الاكبر مني احمد موضف بجامعه بغداد
كريم معلم
واني خريجة لغات فرنسي
واخواتي
خمائل ادارة واقتصاد
وسفانه علوم بايو

صارت بال10 الصبح ورحنه للصالون اني واختي خمائل وحماتي اخت الكبد مالي ميادة جانت صديقتي كولش لان عن طريقهة تقريبا اتعرفت على الكبد مالي..

دخلنه للصالون وجانت اكو عروس قبلنه بدلتهة تجنن كولش حلوة بس ميكاجهة 😧 ميتباوع اني انصدمت 😳 وكلت خرب هاي شراح اطلعني ام الصالون اكيد سعلوة ياربي شراح اسوي شلون اتصرف حتى درب الفلته ميفيد لان الا حجز 😭😭 يقلم فينوس ارام

من كعدنه انطتني ايمان صاحبة الصالون مجلة بيهة تسريحات وميك اب وكلتلي بين ما اشتغل هالعروس اختاري الي تريدي..

اتنهدت وكلت الله كريم اكيد راح تلوصهة بس شسوي حاجزين بهذا الصالون ومااكدر اكولهم غيرو الصالون عبالك لساني انعكد...

لبست البدلة مفتوحة من يم الاكتاف وبيهة اسقيات رفيعة واني اصلا نزلت 3 كيلوات من خبصة العرس والتحضيرات ورهمت عليه فيت بدون تعريض او تكصيف ومنفوشة بدلتي ونازلة على الارض هواي والبركع طويل اخذته وبي نقشة ناعمه وتاج ومسكه وكفوف ولبست وياه طقم كرستال لان مليت من الذهب كلنه نغير واهم شي الشوز اخذته فضي والكعب 3 سم لان اذا اخذ اكثر من 3 سم اصير بطول هيثم الكبد مالي 😁

صدك نسيت اعرفكم على نفسي اني نجوان امي كردية فيلية وابوية عربي مااعرف احجي كردي ولا كلمه 😁😁 وامي من تضوج من عدنه تكعد تفشر وتغلط علينه بالكردي 😂😂😂 واحنه مثل الاطرش بالزفة😐😐😐

راحت اختي خمائل لبيت عيالي وفرشتلي الفرشة واخذت الملابس قبل الحنه بيوم وكتبت ع الفرشة بالورد (هيثم ونجوان) فديتنه نخبل احلى عشاق وصورتلي الغرفة يمه تخبل بس الفرشة لونهة مخرب الدنية لونهة سمائي واني ماحب السمائي بس عمتي والكبد مالتي اختاروهة عود يريدون ولد 😂 شدخل لون الفرشة بالنص ما ادري😐 بس سكتت شسوي ...بقلم فينوس ارام

نرجع للصالون اجه دوري واختاريت التسريحة والميك اب وااكدت عليهة الميك اب اريدة حلو فدوة 😦 ليلة العمر هاي ...

كملتني ايمان وسوت شعري والمكياج وااااو طلعت شكل ثاني كلولي بزووونه طلعتي تخبلين فعلا ميك اب وتسريحة كولش حلوات من ايدهة ومضبوطه همزين جنت خايفة 😁 وحاطة عدسات خضر اختارهن الكبد مالي هيثم وبوترة لامع للجسم صفنت على روحي بالمراية لك فديتني شنو اني ☺☺☺..

اتصل هيثم وكال يلة وصلت اني لاتتأخرون طلعنه وشافني يبوو لعب طوبة بيه

هيثم* هاي شنو اشو ملابسة شي 😨

نجوان * ملابسة شي شنو 😱 لعد هاي شنو خاف دشوف البدلة بجامه شبيك هيثم

هيثم * ولج اني مو كلت لبسي طربوش لاتطلعين مصلخة لخاطر الحمزةةةة ابيش استرج هسة اني

نجوان * طربوش شنو 😒😒 كبوس مغربي وبعدين هي ليلة العمر حباب بس اليوم😁

وركضت طايرة من الصالون للسيارة و هيثم يركض وراية والبنات يضحكن علينه .

صعدنه السيارة ورحنه للمصور رأسا اخذنه 6 صور ورجعنه للبيت والطريق كولة الكبد مالي نوبة يرزلني😶 ونوبة يتغزل بيه 😍😍 بقلم فينوس ارام

انفصام بالشخصية عندة الله وكيلكم 😁😁

وصلنه للبيت ساعه 3 الضهر و راح هيثم واخته ميادة رجعو للبيت خطية ميادة تعبت وياية

لكيت اقاربي كولهم موجودين عمامي خوالي عماتي خالتي اودلاهم بناتهم متتصورون العروس شكد تفرح باللمه وتشوف اهلهة وياهة يشاركوهة اجمل يوم بحياتهة

طبها هزيت وركصت ركص 😁 اي غير عروس وهذا عررسي قابل يومية اعرس 😀طم طح طح طم ودك عيني دك

عبالك ابوية ديعرس مو اني 😂😂

هيثم اتصل عليه واني اردح اجتني ماما كلتلي ولج ثكلي شيكولون هالعالم ولج كعدي فشلتينه وهذا رجلج ديتصل ..
جاوبته للكبد مالي

نجوان*الو كبد

هيثم*ياعيون الحب اشتاقيتلج ولج راح نطلع هسة دنركب السيارة جااايج بالطريييق 😘😘 بقلم فينوس ارام

نجوان*يمة فدوة بالطريق منتضرتك والعباس😁
هيثم* شدسوين اشو تنهتين شبيج ولج

نجوان* عزة شكولة جنت اردح 😁 حبي جنت ابجي ع فراك امي واهلي 😢😢

هيثم * مو اليسمعج يكول ماخذج لموزمبيق😒😒 هي كولهة 10 دقايق

نجوان* اي يلة لعد استعجل 😶

هيثم *😎 الحب مالي على احر من الجمر موو

نجوان*لا 😁😁بس البدلة ضوجتني ثكيلة والسبري بشعري عبالك طابوكه 😇

هيثم* يلة دة اسوق 10 دقايق ويمج حبيبة روحي 😘😘😘😚😚

نجوان * بكل خطوة الف سلامه ياعمري 😍😍

وبهذا الحجي رجعت اردح كلت خل اقفلهة هاي اخر ردحة 😂 وكعدتني خالاتي وامي كوة

امي * ولج شبيج ثولة فشلتينه كعدي راح يجون يشوفوج تردحين عزة صخام 😬 شنكولهم ممصدكه 😒

نجوان* اي ماما قابل يومية معرسة😐 هو يوم واحد خل اشبع ردح💃😁 لا وفوكاهة اخذت الاحبة اي والله حقي اردح اصلا 🙄..

ونسمع صوت الزفة من راس الشارع وصارت خبصة بالبيت الكل يكول اجووو اجوو ...

راد كلبي يطفر من مكانة واهز برجلي وية الطبل والزفة عزة شدسوي خل اثكل 😁فديتك ياروحي والعباس ردت اهلهل بس همزين حسيت على روحي 😂😂😂

كعدو شوي وبقى يغازل و يتغزل بيه فديته .. بقلم فينوس ارام

هيثم* لك شطالع اليوم كيكة بقلاوة كنافة لالا زنود الست بالقشطة خربب والله واحتريت خل انزع السترة..

نجوان* 😱 دتشوفني اكل كدامك حبيبي جوعان 😉 لا حبي فدوة لاتنزعهة هيج احلى مو ديصورون

هيثم* اشتعلو همة يصورون واني مشتعل ولج حاارة حاااارة افتهمي 😒😒

نجوان* اي ادري حارة اصلا شهر 3 كولش حارة 😎😎😎

هيثم * اي خاتون حارة التوقيت اختلف عدنه شنو ممصدكه😒😒

نجوان*مصدكه وداعت راس الباجه الي تحبهة منو كلك مامصدكه 😇😇

هيثم* والله رومانسية تحلفين براس باجة بيوم العرس 😷

نجوان*ليش منو كلي الا اتريك باجه بالصباحية مالت عرسنه 😠 بقلم فينوس ارام

هيثم* اي هم صدك اني حجيت ☻☻ اصلا اكلة الباجه اكلة ملوك شمفهمج انتي بأكل الملوك

نجوان* 😶كافي حباب ابتليت وحلفت براس الباجه كمت اشتم ريحة باجه 😷

من دنطلع من البيت ودياخذني هيثم مدري شصار بيهة 😦 نزلت دموعي شلون راح افارك امي واهلي وابوية فرحانه وبنفس الوقت حزينه شعور مختلط ما اعرف شلون اترجمه صارت صدك وراح اعوفهم 😢😢 نزلت دموعي وماما شافتني وانهزمت للغرفة وشفتهة تبجي انوب اني جلبت بركبه بابا وطكيتهة ابجية عاد ماما مسحت دموعهة واجتي ورادت تضحكني كالتلة لهيثم

ماما* ولك هيثم ستوهة جانت مثل القرد تكمز وتركص دكول عرس ابوهة مو عرسهة وهسة ادمع راح يتخربط مكياجهة وتصير سحيلة ام الخلاجين 😂

عاد اني ابتسمت كولهة ولا اصير سحيلة ام الخلاجين خرب😑

وطلعت وودعت اهلي وبوست ماما وبابا وهيثم هم بوسهم وكلولة ..نجوان امانه برقبتك دير بالك عليهة .....
يتبع....

غدر_الزمن

قصة_حقيقية_لفتاة_عراقية بقلم فينوس ارام

البارت الثاني

هيثم يسوق السيارة واني يمه بالصدر وحارك الجو بالهورنات واصدقائة مو طبيعين يوووو سوو جو مو طبيعي للزفة💃💃💃 وكفونه على جسر الجادرية ونزلونه والشباب اصدقاء هيثم واخوته وهيثم دك ركص خررب شيصير لو اردح وياهم ☹☹ والله حلو شبيكم..

عاد اني رجعت كعدت بالسيارة لان البدلة دمروهة تسحل بالارض وهي طويلة وهمة يكمزون صار لونهة رصاصي من جوة 😂😂 بقلم فينوس ارام

جنت اشوف خواتي وحمواتي بالكوسترات طخت ابالي اروح يمهم 😁 بس عيب فشلة اني عروس خل اكعد واسكت..

وصلنه البيت ورجعو المعازيم وصفينه لوحدنه اني وهيثم

هيثم* لج مو كلتلج انتي الي مو لغيري ☺ تتذكرين شكد تعبنه وبجينه نجوان الله لا يخليني اذا ابجيج لو تدمع عيونج بسببي

نجوان * شلون انسى ايام النضال 😂 اسم الله عليك ياعمري الله لايكولهة يومي قبل يومك يارب❤

هيثم*لاتفتحين شعرج ومكياجج لاتخربي خليج هيج كيكة هسة اجي بس اجيب شي ناكله طكني الجوع

نجوان* مو هذه فواكه وكرزات وجكليت وقواطي ببسي شيحطولك بعد

هيثم* بشرفج هذا هم اكل هذا يضيع بين سنوني حتى للمريء ميوصل اريد شي يدخل المعدة خاتون اريد اسند نفسي 😎😎

نجوان* تسند نفسك شنو راح تطلع عماله الصبح 😁

هيثم * خل اروح اجيب شي ناكله انتي لو عليج نبقى للصبح ود ود ود ود متبطلين حجي..

صدك جاب دجاج مشوي مسوين اهلة ولفات كص وزلاطه وكجب ويهجم الكبد مالتي على الاكل 🍗🍗🍔 ويكولي اكلي ولج اكلي راح تجوعين بعد شوي 😎😎

اكلنه وشبعنه بس الله يحفظه تبنهة لبطنه حتى انفخت جنه واحد حامل 😂 بقلم فينوس ارام

من صار الوقت وديقتربيلي ماكدر ياخذني

هيثم* شنو القصة ليش هيج اكيد انتي السبب نجوان مو دة اكولج لا تخافين انتي هيج دتصعبيهة عليه

نجوان* حبي والله مو قصة خايفة بس اني دة اسوي العليه

هيثم* شتقصدين اني مابيه خير لج احجي من هسة كمتي تشمرين حجي

نجوان* وحق الله مو هذا قصدي اوكف هيثم شبيك ليش عصبي اي صح اني خايفة بس اصبر عليه خل ارتاح ويصير خير راح اكوم اخذ شاور يجوز شوي يخفف ارتباكي ..

مع العلم مجنت مرتبكه كولش اي اكو خوف وارتباك بس مو قوي للدرجه الي يوصفهة هيثم ..
اخذت شاور وطلعت وكلتله هيثم كوم اخذ شاور خل نرتاح احنه جنه بزفة وخبصة اكيد تأثر علينه

هيثم* اني ماعليه شي حبي بس انتي مرتبكه ماله داعي ارتباكج مو 3 سنين حب المفروض هسة انتي ترغبيني مثل ما اني راغبج

نجوان * اي ياعمري اكيد صار تدلل شتريد كولي واني انفذ

وبقينه ونفس الشي مكدر ياخذني وصل بي حالة يكولي مادة احس بشي ولج نجوان مادة احس بشي وكام يبجي واني ابجي وياه

نجوان* لاتهتم هيثم انت حبيبي وتاج وراسي صدك جذب شبيك حبي قابل راح نطير خل نعدي هاليوم

هيثم* ولج واهلج شكولهم اهلي اكدر عليهم بس امج من تجي شحجي شكول

نجوان * معليك باهلي اني اعرف اجاوب امي انت عليك بأهلك واني عليه اهلي

بالصباحية اجو اهلي وجايبين سوالف الريوك مالت الصباحية واجتي ماما وسئلتي عن بياض وجهي

..كلتلهة ماما مابينه حيل نمنه جفي امبارح

امي* اي طبعا من الردح طبعا تتعبون يلة من تفضوهة انطيني علم.

وطبعا نفس الكلام حجة لاهلة هيثم . بقلم فينوس ارام

طبعا ثاني يوم نزلت وية اهل زوجي اشتغل عمتي ماقبلت كالت هسة خل تعدي 3 ايام وتعالي اشتغلي ..

هيثم طلع كلي فد ساعه وارجع

عمتي سالتني شنو صاير شي بينكم اشو طلع جان يحلف ويتوعد بهذا اليوم

نجوان * لا والله عمه ماصاير شي بس كلي ماحب ابقى بالبيت اختنك واصدقائة اتصلو عليه

اجتي ميادة يمي لغرفتي وكعدنه نسولف ونضحك

هي صديقتي من 3 سنين اتعرفت عليهة بندوة للتوعية للنساء ويحثوهن يدخلون محو اميه

هي جانت عدهة 3 صديقات كولش مقربات بس ما اختلطت بيهن بقت علاقتي بميادة بس

بعد شهرين من صداقتي من ميادة صارت ندوة بمركز شباب وبنات يمنه قريب وحضرته بوقتهة وشفتة لهيثم وياهة من ذاك اليوم صار اكو اعجاب واتطورت بينه العلاقة وهاي صارلنه 3 سنين

دخلت يمي ميادة وبدت تسأل عن ملابس معينه (ملابس خاصة)

ميادة* اكولج لبستي هذا لو هذا وشنو الي عجبه
ومن هالاسئلة... واني جنت اجاوبهة
لان هي صديقتي واختي وكولشي جنه نحجي سوية هي بعمري اصغر مني بشهرين ..

اجة هيثم وسالته وين رحت كلي يم اصدقائي راح ياخذ شاور وشفت بجيبة حبايتين وعرفت هالحبوب مالت زيادة القدرة....

سويت نفسي ما ادري ورجعتهن لمكانهم كلت بلكي الله تفض هالسالفة

اخذ الحبة ونفس الشي وهو يبجي واني ابجي ويكولي

هيثم* نجوان ما دة احس بشي شنو القصة ليش هيج

نجوان * خل نطلع من البيت نغير جو نروح فندق او غير مكان يجوز هالامر مئثر علينه ا

ورو يومين نزلت واشتغلت وياهم لان ملل
ف حطيت ايدي بيدهم لان اعرف شوي هالامور حساسة وتنفهم بغير شكل خاف يكولون معاجبني اشتغل او غير شي والشغل ميموت بشر

صار عليه التنضيف وعلى عمتي الطبخ ..

يتبع
البارت الثالث

وصلنه واخذنه غرفة بفندق علمود نرتاح من الطريق وسبحنه واخذنه غفة لان اصلا منايمن احنه ومن التعب نمنه نومه اهل الكهف 😂 وماحسينه غير ساعة 4 العصر

هيثم* اني طالع اجيب شي ناكلة

نجوان * تجيب شي ناكله شنو طلعني وياك خل نروح مطعم شي والله ما ابقة هنا😡

هيثم * مو كلت باليل نزور شوي الزيارة تخف هيج وكت منكدر ندخل

نجوان * اي عادي حبي نضرب بوكسات ونحصل بوكسات والا ازور هسة وباليل ☺

هيثم * هههههههه يلة كومي بس مو تجين شابعه كتل ودفرات من النسوان اني معليه

نجوان* لالا لاتخاف وعيونك اعجنهن عجن 😂

رحنه اتغدينه لفات فلافل😋 وضربنه العمبة وياه وقوطية ببسي كملنه ورحنه نزور

دخلنه لكيناه مكتض بالناس ماشالله كومه بس اني اصريت ادخل الزم الشباك هيثم نصحني بس مسمعت كلامه ردت اثبتله اني كدهة واتلاوة وية النسوان 😂

دخلت وموجه اخذتني وخلتني بالنص عبايتي انجرت وحجابي خنكني واني اجر بعباتي ومدري منو يجر بيهة من النسوان بالجلاليق وصلت الشباك لزمته وجتني روجات اثنين وشمرتني برة عاد طلعت منتفه تنتف كلشي بجهة

طلعت رحت رحت يم هيثم صلينه وكعدنه نسولف

نجوان* هيثم كبدي روح اسال هذول السادة اني سامعه يسوون شغل

هيثم * ولج منعرف احد خاف نتفاشل ونصير مضحكه

نجوان * يمعود شنو نتفاشل هو سؤال وناخذ جوابه قابل شراح يسوون

مشى هيثم وخطوة تاخذة و10 تجيبة واني اباوع عليه عليه واشجعه يروح ... وصل يم غرفة وبيهة سيد لابس عمامه بقى تقريبا نص ساعة يمه واني حسبة تاخذي و10 ترجعني طلع وشفتة من بعيد كلبي ارتاح

هيثم* لج نجوان هذا انطاني شغلات نغسل ونتبخر بيهة واخذلي استخارة يكولي عليك عمل !!

نجوان* عمل شنو منو يسويلك عمل بابا انت هم تصدك بهالسوالف

هيثم * الصمي و لاتستهزئين السحر مذكور بالقرأن شنو نكذب القران وبعدين اني ماجنت هيج شنو ما اعرف نفسي... صدك اكلج هذا يكول اذا تريدون اكو غرفة نروح بيهة وهو يقرة ورة الباب واكدر اتمم الامر

نجوان* 😱😱 لاااااابلة لا عيني لاااا غرفة شنو وهو كاعد ورة الباب عزة ليش لا نروح نرجع للفندق وهناك يصير خير

رجعنه للفندق وسوينهة هالامور بس حرنه المي لازم مينذب بالمجاري معناهة لازم يكون قليل علمود نذبة ع الحايط سوينه المي وتبخرنه ونطانه ورق سدر ( نبق) وكلام نكولة وطبقناهة كولة......وتم الامر الحمد لله ❤

هيثم* اووووف هم ونزاح من كلبي 😥

نجوان* موكلتلك حبي نغير المكان مأثر علينه اصلا من البداية كلتلك بالفندق انت معجبك 😒

هيثم * شعليه المكان😒 الي ساحرلي بس اعرفهم اذا ما انعل والديهم

نجوان* لا حبي ما اتصور لو يريدون يسحرون جان من البداية سوو هالسوالف وبعدين احنه محبوبين الدنية كولهة تحبنه كبدي ماعدنه عداوة وية احد.

هيثم * دكومي صارلي واااهس اطلع وافرررر اليوم افرفرج كربلا كولهة نروح نزور ونديح

نجوان* هلاهلاهلاهلا سخاااته تايم

ورة يومين رجعنه نفسيتنه متغيرة ونضحك للهوى الطاير احلى ايام

مرت الاسابيع واخذت ذبة عيالي اهل زوجي عمتي مسالمه جدا وحبابة وتتحمل هواي بس اذا انفجرت تخرب كلشي

عمي انسان نحس منعرف شيريد كل 5 دقايق برأي

ميادة معليهة بشي لا شغل بيت ولا دراسة دفع اقساط ع الخالي بلاش.... بس عدهة حريه التصرف اطب وتطلع ع راحتهة وبقت على طبعهة تحب تسألني اسألة مالت متزوجين شسويتو شلبستي شكالج بحيث كمت ما اجاوبهة مرات واغلس

بيتنه دائما بي خطار بيت عمهم خالهم عمتهم خالتهم بيت اخوتهم ناس طابة وناس طالعه مع العلم عمي ابو هيثم ماعندة وجه ملكه 24 ساعه معبس 😡بس خطارنه ميخلص ماعدهم احساس 😂😂😂

بهذي الفترة العلاقة بين وبين هيثم اتوترت يوم عن يوم يزيد التوتر لا دة اعرف السبب الي يخلي متنرفز وعصبي وارق ومينام وكوابيس يشوف واني هم اشوف كوابيس ولا دة اكدر اعالج الموضوع

بيوم من الايام مر على زواجي 8 اشهر دخلت عليه ميادة لغرفتي وجنت لابسة ملابس خفيفة بس بغرفتي لابستهة وهي هذا طبعهة تشوف هيثم يطلع هي تجي تدخل لاتستاذن ولا شي بس ماجنت اهتم لان معتبرتهة صديقتي واختي ما اهتميت ..

ميادة* نجوان شوفي هذا النقال اشتريته جديد ايفون لج كامرتة خرافية تعالي خل نتصور

نجوان* لج بيا بهذلة تصوريني سحيلة ام الخلاجين طالعه خل احط ميك اب اغير لبسي

ميادة * اي هسة ميخالف خل نتصور هسة وعود بدلي وتلوني ونتصور بعد شكو ورانه

نجوان* والله خلك عندج اني انحولت من كد ماتعبانه

ميادة * دتعالي شو

وبدت تصورني ميادة لقطة اني وياهة ولقطة لوحدي وخربانين ضحك بس بالصورة لا منضحك عود برستيج احنه بس بعدين كمنه نسوي حركات مخابيل ونتصور ونشبع ضحك بمدري شنو جنة نفكر من الضحك صارت وجوهنه حمر الى

الى ان تجة اليوم الاغبر..... يتبع
البارت الرابع

اجتني ميادة وكلتلي نجوان رايحة يم صديقاتي مسوين عزيمه بيناتنه امشي وياية شعندج بالبيت كاعدة

نجوان* ياريت والله مخنوكه صار شهر ماطالعه 😧 بس خل اتصل على هيثم واكوله

اتصلت على هيثم وكلتلة راح اروح وية ميادة
عدهم عزيمه ابيت صديقتهة

هيثم* اممممم

نجوان* والله مخنوكه هيثم 🙁 خل اروح اغير جو هنة كولهن بنات

هيثم* روحي حبي اعرف هنه بس بنات قابل اقبل اختي تروح لمكان بي ولد يلة روحي بس لاتتأخرون

نجوان * اااااي واخيرا تعالي لج ميادة قبل اخوج اطلع وياج ☺

ميادة * صلوات انفكت الجبسة صدك اكولج شراح تلبسين اني راح البس فستان مشخلع 😁 بس فوكاه صاية

نجوان* لا اني البس بنطلون وتيشيرت ...بقلم فينوس ارام

ميادة* 😝 ايع ولج لاتصيرين بيئة شنو تيشيرت هاي جلسة بنات لبسيلج شي مرتب

نجوان *😒 يعني شلبس بدلة عرس

ميادة * شو دمشي وصلتي الهالعمر ومتعرفين تلبسين 😕

راحت ميادة طلعتلي بدي اسقيات وفوكاه قميص وبنطلون وكالت ذني حلوات لبسيهن

اني هم ماجذبت خبر بس اريد اطلع هسة لو دكولي لبسي بجامه هم البسهة 😂

رحنه لبيت صديقتهة بان بيتهم مشتمل صغير بس جدا حلو ومرتب صديقة ميادة الثانية اسمهة عفراء

عفراء* هلاا والله واخيرا جبتي مرت اخوج وياج

ميادة * اي شعبالج ميادة كول وفعل

بقيت صافنه على كلامهن ما ادري ليش ما ارتاحيت ردت افهم شي من الغازهن مكدرت اجمع شي

نجوان* ليش جنتو منتضريني مثلا وشفت باستغراب لميادة

ميادة * صديقاتي من زمان يحبون يتعرفون عليج بس ماصارت فرصة هسة اجة وقتهة 😉

طبعا بالاضافة لعفراء جانت موجودة بان و ورود هنة ذني صديقات ميادة ماغيرتهن من يوم الي اتعرفت عليهة

بدن يسولفن وينكتن وحطن الغدة دولمه مسويات وحبشكلاتهة

الي افتهمته ان بان الوحيدة لابوهة لان بسقوط بغداد جان ابو بان ماخذ عائلته بالسيارة ودينهزمون من بغداد وبالطريق راميهم الامريكان ورامين هواي سيارات على طريق المحمودية واستشهدت امهة واخوهة واختهة الصغيرة وبقت هي وابوهة لذلك دللهة وماخلاهة تعتاز شي وماقبل يتزوج لان الحادثة اثرت بي جدا

ميادة* اكولج نجوان متنزعين القميص هو منو موجود ابقي بالبدي

نجوان * لا ليش مرتاحه هيج

عفراء * يعني عقدد انتي 😒

بان* لا شنو عقد بكيفهة قابل دكومي يلة

وجرتني من ايدي وشغلن اغاني ونزلن ركص هنة كولهن لابسات ملابس كيموني وقصير ف نزعت القميص وبقيت بالبدي والبنطلون بس ماركصت اشو ماعجبني ورجعت كعدت

حركاتهن غريبة جدا اني صافنه ومركزة عليهن ميادة و ورود وبان وعفراء اكو شي خطاء ديصير بتصرفاتهن يمدن ايديهن على جسم بعض ويتلمسنهة اني نشف دمي😨 جريت القميص ولبسته بهالاثناء بان و ورود دخلن للغرفة وبيناتهن ضحكة وتعابير وجه غريبه بقيت مشدوهة واحس حرارة من وجهي وجسمي تشع تفكيري انشل تماما شنو الديصير معقولة هذا الي ابالي لو ديتهىء الي !!!! بقلم فينوس ارام

ميادة وعفراء بقن يسولفن يمي سوالف عادية سألتهن بان وورود شعدهن بالغرفة لوحدهن؟

ميادة* ورود تحف البان باجر معزومه على عرس

مادخلت عقلي لان اني اوا مرة ادخل الهن وكان من الممكن تأجل هالشغلة

كعدت يمي عفراء

عفراء* اي نجوان شلونج اخبارج

نجوان* الحمد لله بخير

عفراء* شلونج وية الزواج مبين عليج مرتاحة حتى سمنانه

نجوان * اي والله سمنانه من كعدت البيت شسوي

عفراء * مرتاحة

نجوان* اي عيالي حبابين وهيثم خوش ولد

عفراء * معقولة مفتهتمي قصدي 😒

نجوان* وضحي

عفراء* 😁😁 يعني هالسوالف التعبانه الي تصير بين الرجال ومرته

نجوان* 😂😂 ااي لعد ليش شنو الي يحلي الزواج غير هالسوالف التعبانه 😎😎

عفراء * لك لك لك راح تحلى السوالف تعالي ميادة اسمعي مرت اخووج شتغردد 😁😁

ميادة * ااي ولج نجوان تغررررد تغريد يعجبج

هو صح هذا العيب عندي اني احجي واسولف وية صديقاتي بخصوصياتي اني وزوجي وهذا اكبر خطاء

سولفنه وحجينه واشاقينه وبان و ورود بعدهم بالغرفة

كعدت يمي عفراء لزكت بيه كولش واكو مجال تروح بعيد

عفراء * نجوان نيال رجلج بيج لج انتي لكطه

نجوان*😳😳 لكطه
حسيت اكو خطاء والوضع زبالة

نجوان * ميادة منروح

ميادة لج بعد وكت اتعرفي على بان و ورود

نجوان* لو يريدن يتعرفن عليه جان كعدن وقدرني مو هسة اتفطنن يحفحفن 😒

ورة ثواني طلعت بان و ورود ذبيتلهن حجاية

نجوان* اي بالعافية طلعتن كمر 🙄

بان * ها سولفتن الهة اي شعبالج هالسوالف تخلينه نخبل

وبدت تجفص بالحجي
بان* اندري ليش انتي اتزوجتي شنو تخلين رجال يتحكم بيج ويعاملج مثل الحيوان ترة الرجال يفكر بنفسة وبس ميفكر بمرته ...

واسترسلت بالحجي وعرفت بان ورود مجانو بالغرفة يحفن جانن غير سوالفي يسوون

شفت ميادة مابيهة رجه متريد نرجع طلعت نقالي وسويت نفسي دة احجي وية هيثم وغلقته وميادة و ورود يتهامسن اصلا مو يمي

عزة شنو القصة شديصير صحت بصوت عالي شوي ... ميادةة

يتبع

ميادة * 😒 كولي شبيج

نجوان * اخوج خابرني ما ادري شبي يكولي هسة تجون

ميادة * اهوو ستونه اجينه ترة شيريد منج

نجوان * ما ادري بس كلي هسة لااازم تجون
شوفي اذا عاجبج تبقين ابقي بس اني راح اروح اشوف اخوج شبي

ميادة * انتضري هسة اجي وياج يعني شنو هو جان عصبي من حجة وياج

نجوان* اي اي فد مرة صوته ولهجته ينطقن شرار ما ادري شبي

هنا هي ارتبكت راسا طلعنه ورجعنه للبيت شافت ميادة ماكو هيثم والوضع طبيعي جدا باوعت عليه باستغراب

ميادة* شو ماكو رجلج وينه ؟

نجوان * هسة يجي ونشوف شكو والله مادري

سكتنه اثنينه بس اني بقت ابالي هالحركات الي يسونهة والكلام الي حجته بان جان واضح جدا ....اتذكر ونفسي تلعب فد مرة منهة حتى ما اكدر اباوع بخلقتهة معقولة ميادة هيج !!

بس سكتت لان ميادة الهة كلمه يم اهلهة و اخوتهة يسمعولهة يعني مو مال اجي واحجي هيج شغلة جبيرة بدون دليل ....

نوبة اكول اخاف اني متوهمه واظلمهن ونوبة اكول لا نضراتهن حركاتهن تجزززز البشر شنو ما افتهم قابل

بعد كم يوم هيثم طلب مني الدرج يريد ينزل سلاحة فوك الكنتور وكنتورنه عالي جبت الدرج وصعد نزل السلاح

نجوان * شتسوي بهالسلاح ؟؟!!

هيثم*اريد اراوسهة وانطي فرق فوكاه دة اخذ غيرة لكيت وحدة لكطة حرامات تتفوت

وبدة ينطيني اسماء الاسلحة واني كولشي ما افتهم بس جان بالي يم ميادة عبالي كشف شي ويريد يقتلهة 😂😂 تفكير بوليسي مو بيدي

استغليتهة فرصة وصعدت انضف فوك الكنتور نزلت كم غرض ومن ضمن الغراض سماعه جبيرة عدنه دة انزلهة فلتت من ايدي ووكعت
ع الارض

السماعه صندوقهة جبير واحنه اصلا منستخدمهة بس اول زواجي طلبوهة بيت ام اسامه جوارينه لان ابنهم اسامه نجح من الخامس ابتدائي للسادس ورجعوهة ورة يومين وهيثم غلفهة بكيس زباله كبير وصعدهة فوك الكنتور

وكعت السماعه من ايدي وانفتحت واشوف علاكه سودة صغيرة ملفوفة نشمرت منهة فتحتهة بيهة راس لعابة صغير ومشخبط علية بقلم سوفت او ماجك احمر وشعر و ورقة مطبوكه وبيهة قطعه قماش اني من خرعتي صحت بصوت عالي .....ااايع شنو هاي ......

يتبع

بقلم فينوس ارام

البارت الخامس

اجو يمنه بيت حمويني وكعدت اسولف وية مرت حماية الجبير ام احمد عن الصار اشو هاي ضحكت كالت بعدج عروس جديدة ماصارلج سنه ترة ام اسامه شوفتنه الويل بسوالفهة ترة ام سحورة الشارع كوله يعرفهة

نجوان* 😨 لعد ليش ماكلتو مانبهتني

ام احمد * ليش مو رجلج يعرفهة عبالي يحجيلج هالسوالف

نجوان * اصلا لا حجة ولا كال ولا ادري بالموضوع

ام احمد * لاتعتبين حبي الدنية تلاهي واسفة اذا مانبهتج بس ترة هي خبيثة بس ممبين عليهة ابد ورجلهة ع كد ايدهة ولاعبة لعب

نجوان* شنو ام احمد هي جانت تريد هيثم لو شنو بالضبط

ام احمد * هي تريد الزلم كولهة خية 😂😂حتى ابو احمد ماسلم منهة واعتقد هي تشتغل بهالسوالف وتسويهن بيدهة لان دائما المغرب عدهة دخان بالبيت شوفي هي تحس بنقص كولنه نعرفهة

ام احمد* حبي طالما هيج يعني حاطه عينهة على هيثم اصبري فد اسبوعين واجيبلج خبرهة واكولج

نجوان* صدك ام احمد تكدرين

ام احمد * اي لان بنات اختهة صديقات مرت اخوية 😁

من عمتي اخذت هالامور وذبتهن وحطت عليهن مدري شنو شوي الكوابيس الي جنه انشوفهة خفت حتى جنه منحب نبقى بالغرفة نختنك منهة هسة لا ارحم

وفعلا ورة فترة ام احمد جابتلي الخبر اليقين ام اسامه مشتغلة هالسحورة لان تريد هيثم لبنت اختهة شافته صار عده محل والامور اتعدلت حطت عينهة عليه من جان ماعدة شغل وعاطل عن العمل ماكلبته

مشت الايام وورة تقريبا اسبوع
ميا دة* حبي نجوان تجين وياية اليوم عدنه عزيمه ثانية تخبل وهمين منتأخر

نجوان* لالالا حبي روحي انتي لوحدج اني تعبانه اصلا

ميادة* لج تفوتج والله ونسة واكل وركص امشي خل نغير جو يولي شبيج

نجوان * لا ماريد اغير جو يم هالبنات روحي انتي بس انتبهي ع نفسج ميادة ترة البنت اغلا شي سمعتهة وشرفهة

ميادة * 😒اي قابل ما اعرف والله يالله

وراحت وتركتني وهي تهز بيدهة واتدرم عليه
ثاني يوم

ميادة* نجوان امشي دنروح لطبيب الاسنان اسناني موتتي من امبارح منايمه

نجوان * شوكت ساعه بيش تطلعين اني هم اريد اجيك اسناني

ميادة * ب 3 الضهر نطلع علمود نلزم سرة اول الناس منتأخر

نجوان * اي يلة عادي

طلعنه دنروح لطبيب الاسنان وبالطريق دنتمشة فتحت جنطتهة ميادة وصاحت

ميادة* اهووو خرررب ولج الجزدان نسيته يم بان خرب بالحظظظظظ الاغبر

نجوان * ادري يالغبية غير اتجيكين جنطتج قبل لاتطلعين

ميادة * ولج الم اسناني عماني عمي شسوي خرب بحضي فلوسي مو هواي

نجوان * اني شايلة حبي فلوس امشي نروح

ميادة* لالا امشي نروح لبيت بان اجيب الجزدان فدوة ونرجع ركض منتأخر

نجوان* راح اوكفلج براس الشارع وانتي روحي جيبي الجزدان وتعالي

ميادة * وين توكفين مو هالخبلة تجلب بية اذا تشوفني لوحدي ولج حتة راسي انسطر امشي وياية علمود تشوفج وتصدك دمشي يلة امشي دنلحك ع الطبيب

نجوان* مشيت وياهة واني الوم بيهة شنو هالحيوانات مصادقتهن ابد مارتاحيت الهن وصلنه لباب بيتهة دكتهة ميادة وطلعت بان

بان* هلا والله نورتو

ميادة * اجيت اخذ جزداني دنروح للطبيب

بان* اي دخلي امبارح تركتي هنا ورحتي هلا بيج نجوان دتعالي محد بالبيت بس اني حتى ابوية خطية بالدوام يرجع باليل

نجوان * لا شكرا ماريد هسة تجي ميادة مستعجلين

بان* تعالي عمي شبيج ترة منكرص ولا ناكل بشر احنه وجرتني من ايدي

دخلت يمهن بس بقيت واكفة يم الباب مقبلت اتحرك وبقيت الباب مفتوح ولازمته بيدي مقبلت تسدهة

نجوان* يلة ميادة لكيتي جزدانج

كالت اي لحضة

بان * نجوان انتي حلوة وجسمج حلو معتنية بنفسج تعجبيني

نجوان* اعوذ بالله اكلج عيب هالحجي شبقيتن للولد كبر اي والله

بان * ايع ولد شنو لج شبيج والله احنه احسن من الف ولد اندمجي ويانه ومتخسرين شي

نجوان * متخافين على سمعتج سمعه ابوج لج هذا حرام ولعبان نفس الي تسونه لاعبالج اني مفهمتت شتسوون هنا ولج هذا شي يقزززز

وصحت بصوت عالي ميااااادةةةة يلة عااااد ماجاوبتني

حسيت الجو مو تمام اني واكفة يم الباب مقبلت اتحرك عرفت ميادة باعتني الهن الباب بيدي مفتوح فتحته دفعته ودة اطلع اجتي بان تلزم بية من جسمي ودكولي انتي تعجبيني دفرتهة وطلعت ركض صاحت علية وكلتلي الا اكسر ضهرج اصبريلي

طلعت بالشارع اركض الله ستر ماصار شي بس طلعت مثل المخبلة امشيي واكول عوذة ايع اعوذ بالله والناس صافنه بس بوقتهة فقدت مهتميت الناس تباوع عليه او لا

رجعت ارجف ونفسي تلعب ابد مكدرت انسى الموقف وكل شوي استفرغ و مكدرت احجي لهيثم شي لان مابيدي دليل اكيد تنكلب ضدي اذا احجي

ام هيثم* اااي صلوات حامل مرتك يمه

نجوان * لامو حامل 😒

هيثم* لاتسوين نفسج ابو العريف امي مخلفة 15 واحد افهم منج بهالسوالف

نجوان* اهو دكول مو حامل نفسي لعبت شفت فلم رعب امبارح كولة دم وبعدني اتذكرة

هيثم * مو كد الافلام ليش تتفرجيهن😑

نجوان* 😧

ام هيثم* اخذهة للعيادة الشعبية اليوم وتأكدو هي حامل لو لا لاتضلون تتناكرون

رحنه للشعبية وطلع ماكو حمل .... مو كلتلك هيثم شنو ما اعرف نفسي

هيثم* لعد شبيج خبصتينه خبص 😕
نجوان * ادلل عليك حياتي 😍

بعد كم يوم اجتني ميادة

ميادة * نجوان ماراح اطول بالحجي وياج بان تريدج ........
يتبع

#غدر_الزمن

قصة حقيقية لفتاة عراقية
بقلم Venus Aram

البارت السادس والاخيرر

بعد كم يوم اجتني ميادة

ميادة * ماراح اطول بالحجي وياج بان تريدج

نجوان* اكولج ليش ماتنجبين والج عين تحجين شكد صلفةةة اصلا فضل مني عليج ماحجيت مخازيج لاخوج لان اخاف علا زوجي لايذبحج ويروح رجلي بيهة وانتي خلك وحدة قذرة

ميادة* ههههععع لا والله ضحكتيني اكولج خانم ترة صورج يمي ويم بان وعفراء نلعب بيج جووولة اذا حجيتي شي

نجوان* لا والله خوفتيني فوك شينه كوات عينه وبعدين مبينه الصور انتي اخذتيهن الي فماتكدرين تسوين شي ..

ميادة * ياعيني عليج يعني هسة تتحدين بان ومتروحين موو حقج متعرفين منو بان ..

نجوان* انعل ابوج لابو بان لابو كل وحدة نكسه وساقطة مثلجن لج المفروض انتي الي تخافين مو تخووفيني لا انتي ولا 100 مثلج يخوفوني

ميادة * باعي لج اخاف عبالج انتي ذكيه ترة اني استاذتج خانم

نجوان * اسمعي يويل ترة الي شفته هذاك اليوم ابيت صديقتج والي رادن يسوونه مناسيته ثقي بالله اكول لاهلج اخليهم يدفنوج انتي وحية

ميادة * اي و انتي وياية اشتركتي متكدرين اتفكين نفسج بعد ولاتسوين نفسج شريفة براسي ترة اكسر ركبتج واسحلج سحل وربج

نجوان * طبج مرض اعلى مابخيلج اركبي الحمد لله مو شاذة اني مثلجن

ميادة * هههعععع الله يرحمج رحتي بالزلك يعني متروحين وياية.. مو خطية بان كتلت نفسهة عليج

نجوان * لج اطلعي نكسة قذرة 💦عليج

بهالاثناء اجة هيثم وصار الي صار كدامه استغرب من شافنه دنتعارك وهيج حجيت بوجه اخته لان احنه ابد ممتصايحين ولا اصلا متزاعلين ولا حاجين شي بالعكس صديقات

هيثم * 😳 خيرجن شبيجن شنو صاير

ميادة* 😢هو هذا الي يسوي زين بهالوكت هيج يعاملو
وتبجي بدموووع وصارت حمرة واني صافنه عليهة

ميادة* جنت انصح مرتك بس شووف شسوت شلون تغلط

نجوان* بقة لساني معكود اريد احجي هي متنطي مجال وهو مديفهم شي

ميادة* مرتك ادز صورهة للبنات وتحجي حجي مينحجي كدامنه وتريد تسوي شغلات استغفرررر الله استغفرر الله واحنه مامتزوجات تريد اشوفك واثبتلك

هيثم صارت عيونه بنص راسة شدتحجين شنو صاير اريد افتهم

كعدنه بالهول وصار المصايح هي تحجي واني احجي بس هي مضبطة امورهة مو مثلي اني احجي بدون دليل او حجة

هيثم بالبداية بقى مصدوم ويباوع عليه واني احاول افهمة بس ماكو فايدة

وتالي بدة يضربني ويكولي ساقطة انصدمت بيج لج ادورين بنات يعني اتدورين ولد لج سافلة شاذة شنو هالقذااره انتي ساقطة ويضرب ويدفر مبقة مكان بية صاحي اريد احجي افهمة لساني انعكد اصلا عبالك فقدت النطق ..

ميادة شوفت لهيثم محادثات جنة نحجيهة ع الواتساب اني وميادة وصديقة النه مشتركه اسمهة نباء

طلعت نباء اخت عفراء واني ما ادري ودزوهة عليه بالفيس وتصادقنه وصارت صداقتنه قوية واتبادلنه الارقام وتحولنه ع الواتساب نحجي ونسولف وسوينه كروب ع الواتساب ودخلت ميادة بي عود دة اعرفهة على نباء وطلعن هنة متفقات عليه يوكعني لان جانت بان معجبة بية اعوذ بالله ...

بقيت صافنه شنو ديصير يارب يطلع كابوس واكعد منه

صوري نشروهة بكروبهن للواتساب خاص بينهن وشاف المحادثة والصور مالتي واعتقد هيثم اني دازتهن لهلبنات صار اعصاب وماكام يعرف يفكر

كولشي اثبت عليه وانقلب ضدي وخصوصا من طلعت وية ميادة ونزعت القميص وبقيت بالبدي مكان غريب شلون البس هيج وطلعن هنه مصوراتني واني ما ادري 😢 لذلك محد صدك بيه من حجيت ع ميادة ....

الطريق كولة يبجي هيثم ويكولي لج معقولة انتي هيج بهذا المستوى من القذارة

نجوان * بس اسمعني هيثم

هيثم* ولااااا نفسسس ماريد اسمع صوتج هسة انزلج من السيارة وادوس عليج اشششش اشششششش

وصلنه وشمرني ابيت اهلي سنه 2014 شهر 8
يعني ميلاد زواجنه صار بالظيم

هيثم* هاي قذارتكم اخذوهة واتصرفو وياهة ماريد اوسخ ايدي

وعافنة وطلع هيثم ..

بابا واخوتي ركضو وراه يريدون يتضاربون وياه بس اني منعتهم كلتلهم اتركو الغضب عمى عينه اتركوو

بابا * شنو شبيج نجوان شصاير لج احجي فهميني شمسوية وهذا هيج مسوي بيج !!!!؟؟؟

امي* عزة بعيني عزة بعيني ولج شبيج شنو هاي الدم من وجهج لج شكو شصااااير فهميني

اخوتي وخواتي نفس الكلام كلتلهم بس خل ارتاح واحجيلكم..
غسلت وجهي وشفت نفسي بالمراية ممبينه ملامحي من الضرب وراسا اتذكرت يوم عرسي انقلبت حياتي من اسعد يوم لأتعس يوم...

بابا * احجي مابقى صبر عندي

نجوان*راح احجيلكم من البداية بس وحق الله بابا اني ماعندي شي اني تربيتك انتو كلكم تعرفوني

بابا* بلا مقدمات واحجي ترة ضغطي ارتفع

يتبع

ماما* اهدء يارجال لايروح يصير بيك شي

بابا* الي يشوف هالوضع يروح تفكيرة لبعيد احجي

نجوان*بديت احجيلهم كولشي من البداية الى يوم المشكلة والي صار

ماما* لج انتي اثبتيلي ماعندج عقللللل ثووولة لج شلون تسمحين لحماتج تدخل غرفتج وانتي بيهة وشلون تتصووررررريننن بهيج ملابسسسس لج وين عقلج وبدت تضربني

وخواتي خمائل وسفانه وكفو بيني وبين امي وهدئنهة

نجوان * وحق الله ماما جنت اعتبرهة مثل خواتي

بابا* لج ياخوااااات حتى الخوات لازم تمنعيهن يصورنج بهيج ملابس كلشي اله حررررمه واله حدووود معقولة انتيي يطلع منج هالتصرف شلون نثبت برائتج هسةة لا اله الا الله

نجوان* لابسة بغرفتي ماطالعه خارج غرفتي وحق الله 😭

اهلي عيونهم تضوي شرار صح حجو علية ورزلوني واستاهل بس اهم شي صدكوني ..

ابوية اتصل على ابو هيثم وكلة نحلهة بينه بنتنه متنازلة عن حقهة وابنكم يطلكهة وتخلص السالفة

نجوان* ليششش بابا هيج حجيت ما اتنازل فوك الي سوو بيه واني اشررف منهم كولهم

بابا* اسكتي بنتي انتي متعرفين الي ممكن يصير اخاف يسووهة عشائرية وننفضح بالمنطقة ..

نجوان* ننفضح شنو! بابا انت مامصدكني ؟

بابا * مصدكج بس مابيدي اثبات وضبي السانج وسكتي خلي اعرف افكر ونخلص من هالمصيبة..

اتنازلت عن كل حقوقي واتطلكت منه حسب اتفاق ابوية وابو هيثم

بقيت صافنه على حالي معقولة هذا الي صار بيه معقولة هذا مو كابوس دخيلك ربي بين برائتي مبقيت نذر ولا دعاء مسويته

حسيت نفسي انكسرت كلش وبيوم وليلة كلشي خسرت اتدهورت نفسيتي ولاكمت اعرف الليل من النهار واختلاطي بالبشرر صار معدوم وفقدت الثقة بأقرب الناس الي...

مرت الاشهر واهلي ساندوني شجعوني اوكف على حيلي مرة ثانية

كريم* نجوان تعالي عندي موضوع وياج😁

نجوان* يمة اخوية الحلو عندة موضوع كول

كريم * اكو معلمه وياية اسمهة سارة تسوي ورد صناعي تشتغلة بيدهة شي كلش حلو ليش ما تتواصلين وياهة وتعلمج

نجوان* ورد ! لا كريم وين اعرف لهاي الامور وبعدين ماريد اختلط بالناس كافي الي صار..

كريم * شنو هالحجي ؟ قابل كل اصابعج سوة اكو الزين واكو الشين وانتي راح تتعلمين صنعه حلوة وتفيدج بما انو انتي دافرة التعيين 😁😁😁😂

نجوان* خرب لاتذكرني اني خريجة 😣

كريم * اكو واحد يروح لغه فرنسية بالعراق 😐 هو الانكليزي هالله هالله انوب فرنسي حمضتي 😂

نجوان* انجب 😒

كريم * يلة عاد فضيهة علمود ارجع خبر للبنية

نجوان*🤔🤔 اشو مهتم شعندك وياهة

كريم*😁😁😁

نجوان*☺☺ تحبهة

كريم * شعلت اهلي متقبل تحجي وية احد خارج حدود الدروس فكلت ماكو غير اختي حبيبتي الثولة تساعدني 😎

نجوان * 😇 فديتني حمامه مكة 😂 اي يلة ميخالف اتعلم لخاطرك بس اريد خاوة خو مو بلاش 😁

كريم* وجع 😒 باجر احجي وياهة وارجعلج خبر

نجوان* باع الثول يعني بعدك ماحاجي وياهة

كريم * لا باجر اجدي بيج 😂😂 اكولهة اختي مشردة ماعدهة تعيين بلكي تعلميهة صنعهة

نجوان * 😑😑😑 كوم من يمي لا ادفرك

وفعلا خطية البنت ما مانعت وعلمتني وكمنة نشتغل اني وياهة لان شي مسلي وحلو صناعة الورد

مرت سنة واني ماكدرت انسى هيثم هواي ايام الجي بحركه واتحسب على ميادة وصديقاتهة

خلال هاي السنه جانت تجيني تلفونات من ارقام غريبة بس ما ارفع خط ما اعرف ليش جنت احس هذا هيثم الي ديتصل..

نهاية سنه 2016 شهر 12 هيثم اتصل علية من رقمه حسيت كلبي راح يطلع من مكانه من شفت الرقم بس ماجاوبت كلت لاهلي هيثم ديتصل عليه

بابا * لاتجاوبين لبسي

نجوان* ليش بابا بس خل نفتهم شيريد

بابا* لان اخته انفضحت

نجوان* 😳😳😳 بابا شنو صاير الله كلي

بابا* وصيت اخوتج ميحجون لان اشتهرت اخته بالمنطقة

نجوان* اي ليششش ماحجيتووو ليش مافرحتوني ليشش جنت انتضررر هاليوم صارلي سنتين ليشش ماحجيتو

بابا* لان بعدج تريدين هيثم عبالج ما ادري بيج اني وامج نعرفج كلش زين هسة بس يتصل عليج ترجعيلة

نجوان* بقيت ساكته وابجي كلتلة ع الاقل فرحني خليني اعرف الله استجاب دعائي

بابا * حق المظلوم ميضيع وهاي ضهرت برائتج وهمة تخزو ونفضحو بس خليهة ابالج رجعه لهيثم ماكو

مرت الايام وهيثم يتصل ويرسل مسجات واني ما أرد بس جنت راح اموت واعرف شلون انكشفت ورة اكثر من 10 اياام هيثم اتصل كلت لازم اجاوب بعد ما اكدر

نجوان* نعم

هيثم * مشتاق اسمع صوتج شلونج نجوان اخبارج

نجوان* كولش زينه .. اللهم لاشماته شوفو وين صفة بيكم الدهر حق المظلوم ميضيع

هيثم* حقج تشمتين ما الومج الي سويتة بيج مو قليل

وبدة يحجيلي شلون اخته انكشفت ...ابو بان اتوفى واجه عم بان واخذهة وياه وباعو البيت
وبقت ميادة وعفراء ورود يلتقن كل فترة ابيت وحدة منهن
وبيوم من الايام اجتمعو يم ورود ابيتهة وهناك اخو ورود اكتشفهن وصارت الفضيحة واتصلو على اهل هيثم

هيثم* نجوان احنه راح نشيل من بيتنه ونتحول لغير مكان نترك الرصافة نروح للكرخ

نجوان * واختك وين

هيثم * قتلهة اخوية ابو احمد...

نجوان* 😳😳😱 قتلهة

هيثم* صرنه فرجه للعالم محتاجلج نجوان معقولة نسيتي حبنه لج مايوم نسيتج والله

نجوان * من جنت محتاجتك مالكيتك شمرتني يم اهلي ورفضت حتى تسمعني ع العموم ابوية ميقبل احجي وياك المهم ضهرت برائتي وارتاحيت والله لايسامح اختك على الي سوته بية ولو هي راحت لرحمه الله بس ما اكدر اسامحهة

وغلقت النقال وشبعت بجي لان فعلا بعدني احبة

بداية 2017 هيثم اجة لبيتنه وياه 2 من عمامه وبقو يحجون وية ابوية واخوتي واني كاعدة ورة الباب واسمع الهم جنت راح اركص من الفرحة يمةةة من شفته بالباب ردت اركض عليه واحضنه 😁

المهم بعد محادثات ومناقشات الله هداه لابوية وقبل ارجعلة بس بشروط اهمهة بيت لوحدي كلة عمي اني ماناوي ابقى بالعراق اريد اطلع

والحمد لله اتزوجنه مرة ثانية متتصورون اللهفة عليه ولهفته عليه اتناسينه المصايب الي مرت بينه وحاليا اني وزوجي بغير محافضة لان بعدنه ماعدنه الامكانية نطلع للخارج

واخوية كريم خطب سارة المعلمه الي وياه والله يسعدهم يارب هواي وكفو وياية وساندوني

اهم درس اتعلمته ما اثق بسرعه بأي شخص مهما يكون وما انطي اسراري واحجي تفاصيل حياتي الخاصة لان هسة للاسف منتشرة هالامور وما اسمح لشخص أيا كان يخترق حياتي لكل شي خطوط حمراء ميصير يتجاوزهة والاهم من هذا كلة ثقتي بربي وايماني ان الحق يضهر وتضهر يرائتي واتحققت والحمد لله .... ادعولنة بالذرية الصالحة 😘
هذه قصة نجوان وهيثم واتمنة استفاديتو منهة اهم شي نتابع اولادنه بنات او اولاد ومنتركهم لان الزمن غدار الله يحفظ اولادنه وبناتنه يارب.

قصة فتاة وشاب,قصة فتاة حزينة,قصة فتاة تأخرت فى الزواج,قصة فتاة يتيمة,قصة فتاة حملت من حبيبها,قصة فتاة الاوز,قصة فتاة مع الزمان,قصص بنات,